ಜಸ್ವೀರ್ ಸಿಂಗ್‌ಗೆ 'ಆರ್ಡರ್ ಆಫ್ ದ ಬ್ರಿಟಿಶ್ ಎಂಪಯರ್' ಪ್ರಶಸ್ತಿ
ಲಂಡನ್, ಎ. 3: ಲಂಡನ್ ಬ್ಯಾರಿಸ್ಟರ್ ಜಸ್ವೀರ್ ಸಿಂಗ್ ‘ಆರ್ಡರ್ ಆಫ್ ದ ಬ್ರಿಟಿಶ್ ಎಂಪಯರ್ (ಒಬಿಇ)’ ಪ್ರಶಸ್ತಿ ಪಡೆದ ಜಗತ್ತಿನ ಅತ್ಯಂತ ಕಿರಿಯ ಸಿಖ್ ಆಗಿದ್ದಾರೆ.
ಜಸ್ವೀರ್ ಸಿಂಗ್ ಲಂಡನ್‌ನಲ್ಲೇ ಹುಟ್ಟಿ ಬೆಳೆದವರು. ಅವರ ಕುಟುಂಬಿಕರು ಪಂಜಾಬ್‌ನ ಡೊವೊಬ ಎಂಬ ಗ್ರಾಮದವರು.
‘‘ಆರ್ಡರ್ ಆಫ್ ದ ಬ್ರಿಟಿಶ್ ಎಂಪಯರ್ ಪ್ರಶಸ್ತಿ ಪಡೆದಿರುವುದಕ್ಕೆ ನನಗೆ ಹೆಮ್ಮೆಯೆನಿಸುತ್ತಿದೆ. ಇದು ನನಗೆ ಅಚ್ಚರಿಯ ವಿಷಯವಾಗಿದೆ. ಕಳೆದ ಏಳು ವರ್ಷಗಳ ಅವಧಿಯಲ್ಲಿ ಸಾಮಾಜಿಕ ಏಕತೆಗಾಗಿ ನಾನು ನಡೆಸಿದ ಪ್ರಯತ್ನಗಳು ಈ ರೀತಿಯಲ್ಲಿ ಫಲ ನೀಡಿರುವುದಕ್ಕೆ ಸಂತೋಷವಾಗಿದೆ’’ ಎಂದು ಅವರು ಪ್ರತಿಕ್ರಿಯಿಸಿದ್ದಾರೆ.
ಸಿಂಗ್ ‘ಸಿಟಿ ಸಿಖ್ಸ್’ ಎಂಬ ಸಂಘಟನೆಯ ಸ್ಥಾಪಕ ಅಧ್ಯಕ್ಷ ಹಾಗೂ ‘ಫೇತ್ಸ್ ಫೋರಂ ಫಾರ್ ಲಂಡನ್’ನ ಅಧ್ಯಕ್ಷರಾಗಿದ್ದಾರೆ.
ಈ ಸಂಘಟನೆಗಳು ಲಂಡನ್‌ನಲ್ಲಿರುವ ಕ್ರೈಸ್ತ, ಮುಸ್ಲಿಮ್, ಯಹೂದಿ, ಹಿಂದೂ, ಸಿಖ್, ಬೌದ್ಧ, ಜೈನ್, ರೊರಾಸ್ಟ್ರಿಯನ್ ಮತ್ತು ಬಹಾಯಿ ಎಂಬ ಏಳು ಪ್ರಮುಖ ಧರ್ಮಗಳ ಅನುಯಾಯಿಗಳ ಹಿತಾಸಕ್ತಿಗಳನ್ನು ಕಾಯ್ದುಕೊಂಡು ಬರುತ್ತಿವೆ.
‘‘ನಮ್ಮಲ್ಲಿ ಹಲವಾರು ರಾಷ್ಟ್ರವ್ಯಾಪಿ ಯೋಜನೆಗಳಿವೆ. ಅವುಗಳ ಪೈಕಿ ಒಂದು ವಿಭಜನೆ ಪೂರ್ವ ಭಾರತ, ವಿಭಜನೆ ಅವಧಿಯ ಭಾರತ ಮತ್ತು ಈಗಿನ ಬ್ರಿಟನ್‌ನಲ್ಲಿರುವ ಹಿಂದೂ, ಸಿಖ್ ಮತ್ತು ಮುಸ್ಲಿಮ್ ಸಮುದಾಯಗಳ ನಡುವಿನ ಸಂಬಂಧಗಳ ಬಗ್ಗೆ ಅಧ್ಯಯನ ಮಾಡುತ್ತಿದೆ’’ ಎಂದು ಸಿಂಗ್ ಹೇಳುತ್ತಾರೆ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ