ಗಾಯಕನಾಗಿ ಹೊಸ ಇನಿಂಗ್ಸ್ ಪ್ರಾರಂಭಿಸಿದ ಸಚಿನ್
ಮುಂಬೈ: ಮಾಜಿ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಇನ್ನು ಮುಂದೆ ಗಾಯಕರೂ ಹೌದು. ತಮ್ಮ ಆಕರ್ಷಕ ಬ್ಯಾಟಿಂಗ್‌ ಮತ್ತು ದಾಖಲೆಗಳ ಮೂಲಕ ಜನಪ್ರಿಯರಾದ ತೆಂಡೂಲ್ಕರ್, ಇದೇ ಮೊದಲ ಬಾರಿಗೆ ಹಾಡಿಗೆ ದನಿಯಾಗಿದ್ದಾರೆ.
ದೇಶದ ಮಹಾನ್ ಕ್ರಿಕೆಟ್‌ ತಾರೆಯರಿಗೆ ಅರ್ಪಿಸುವ ಸಲುವಾಗಿ ಸಿದ್ಧಪಡಿಸಿರುವ ಗೀತೆಯನ್ನು ತೆಂಡೂಲ್ಕರ್ ಹಾಡಿದ್ದಾರೆ. ಅವರ ಜತೆ ಗಾಯಕ ಸೋನು ನಿಗಂ ಕೂಡ ದನಿಗೂಡಿಸಿದ್ದಾರೆ.
‘ಸಚಿನ್ಸ್‌ ಕ್ರಿಕೆಟ್‌ವಾಲಿ ಬೀಟ್‌’ ಎಂಬ ಶೀರ್ಷಿಕೆಯ ಹಾಡಿಗೆ ಶಮೀರ್‌ ಟಂಡನ್‌ ಸ್ವರ ಸಂಯೋಜಿಸಿದ್ದಾರೆ. ಈ ಹಾಡನ್ನು ತೆಂಡೂಲ್ಕರ್ ಇತ್ತೀಚೆಗೆ ಆರಂಭಿಸಿದ ‘100 ಎಂಬಿ’ ಡಿಜಿಟಲ್‌ ವೇದಿಕೆಯ ಪ್ರಚಾರದ ಭಾಗವಾಗಿ ಸಿದ್ಧಪಡಿಸಲಾಗಿದೆ.
‘ಇದೇ ಮೊದಲ ಬಾರಿಗೆ ನಾನು ಹಾಡುವುದನ್ನು ಜನ ನೋಡಲಿದ್ದಾರೆ. ನಾನು ಹಾಡುವುದನ್ನು ಅನಂದಿಸಿದಂತೆ ನನ್ನ ಎಲ್ಲ ಅಭಿಮಾನಿಗಳು ಕೇಳುವುದನ್ನೂ ಆನಂದಿಸುತ್ತಾರೆ ಎಂಬ ವಿಶ್ವಾಸವಿದೆ’ ಎಂದು ತೆಂಡೂಲ್ಕರ್ ಹೇಳಿದ್ದಾರೆ.
2011ರ ವಿಶ್ವಕಪ್‌ ಗೆದ್ದ ಆರನೇ ವಾರ್ಷಿಕೋತ್ಸವದ ದಿನವಾದ ಭಾನುವಾರ ಈ ಹಾಡನ್ನು ಬಿಡುಗಡೆ ಮಾಡಲಾಯಿತು. ಎಲ್ಲ ಆರು ವಿಶ್ವಕಪ್‌ಗಳಲ್ಲಿ ತಮ್ಮೊಂದಿಗೆ ಆಡಿದ ಪ್ರತಿ ಆಟಗಾರ ಹೆಸರನ್ನೂ ತೆಂಡೂಲ್ಕರ್ ಉಲ್ಲೇಖಿಸಿದರು.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ