ಪ್ರಮುಖ ಪ್ರಕೃತಿ ವಿಕೋಪಗಳು

*2016 ರ ಪ್ರಮುಖ ಪ್ರಕೃತಿ ವಿಕೋಪಗಳು*
*Mon, 3 Apr 2017 :*

*2016 ರ ಪ್ರಮುಖ ಪ್ರಕೃತಿ ವಿಕೋಪಗಳು*

1) ಮಂಗೋಲಿಯಾದಲ್ಲಿ ಭೀಕರ "ಡ್ಜೂಡ್" ಹಿಮಪಾತ
ಕಳೆದ ಜನವರಿಯಲ್ಲಿ ಮಂಗೋಲಿಯಾದಲ್ಲಿ ಸಂಭವಿಸಿದ ಭೀಕರ ಹಿಮಪಾತದಿಂದಾಗಿ ಸಾವಿರಾರು ಮಂದಿ ಪ್ರಾಣತೆತ್ತಿದ್ದರು. ಭೀಕರ ಚಳಿ ಹಾಗೂ ಹಿಮಪಾತದಿಂದಾಗಿ ಲಕ್ಷಾಂತರ ಸಾಕು ಪ್ರಾಣಿಗಳು ಕೂಡ ಅಸು ನೀಗಿದ್ದವು. 2015 ರ ನವೆಂಬರ್ ನಿಂದ ಆರಂಭಗೊಂಡಿದ್ದ ಹಿಮಪಾತ ಜನವರಿ ತಿಂಗಳಲ್ಲಿ ಭೀಕರ ಸ್ವರೂಪ ಪಡೆದಿತ್ತು.

2) ತಾಂಜೇನಿಯಾ ಪ್ರವಾಹ
ಕಳೆದ ಜನವರಿ 17 ಮತ್ತು 18ರಂದು ತಾಂಜೇನಿಯಾದಲ್ಲಿ ಸಂಭವಿಸಿದ್ದ ಭಾರಿ ಪ್ರವಾಹದಿಂದಾಗಿ ಸಾವಿರಾರು ಮನೆಗಳು ನೆಲಸಮಗೊಂಡಿದ್ದವು. ಡೊಡೊಮಾ ಮತ್ತು ಬಾಹಿ ಜಿಲ್ಲೆಗಳಲ್ಲಿ ಸಂಭವಿಸಿದ್ದ ಪ್ರವಾಹದಿಂದಾಗಿ ಸುಮಾರು 2800 ಮಂದಿ ನಿರಾಶ್ರಿತರಾಗಿದ್ದರು. ಬಾಹಿ ಜಿಲ್ಲೆಯೊಂದರಲ್ಲೇ ಸುಮಾರು 155 ಮನೆಗಳು ಕೊಚ್ಚಿಕೊಂಡು ಹೋಗಿತ್ತು.

3) ಹೈಟಿ ಪ್ರವಾಹ
ಹೈಟಿಯಲ್ಲಿ ಸಂಭವಿಸಿದ್ದ ಭಾರಿ ಪರಿಣಾಮ ಉಂಟಾಗಿದ್ದ ಪ್ರವಾಹದಲ್ಲಿ ಒಟ್ಟು 8 ಮಂದಿ ಸಾವನ್ನಪ್ಪಿದ್ದರು. ಭೀಕರ ಪ್ರವಾಹದಿಂದಾಗಿ ಹೈಟಿಯ ಪೋರ್ಟ್ ಡಿ ಬೆಕ್ಸ್ ಪ್ರಾಂತ್ಯ ಸಂಪೂರ್ಣ ಜಲಾವೃತ್ತವಾಗಿತ್ತು. ಪ್ರವಾಹಕ್ಕೆ ಸಿಲುಕಿ ಸುಮಾರು 1 ಸಾವಿರಕ್ಕೂ ಅಧಿಕ ಕುಟುಂಬಗಳು ನೆಲೆ ಕಳೆದುಕೊಂಡು ನಿರಾಶ್ರಿತರಾಗಿದ್ದವು.

4) ತೈವಾನ್ ಭೂಕಂಪನ
ಫೆಬ್ರವರಿ 6ರಂದು ಚೀನಾದ ತೈವಾನ್ ನಲ್ಲಿ ಸಂಭವಿಸಿದ್ದ ಭೀಕರ ಭೂಕಂಪನದಲ್ಲಿ ಸುಮಾರು 36 ಮಂದಿ ಸಾವನ್ನಪ್ಪಿದ್ದರು. ರಿಕ್ಟರ್ ಮಾಪಕದಲ್ಲಿ 6.6ರಷ್ಟು ತೀವ್ರತೆ ದಾಖಲಾಗಿತ್ತು. ಭೂಕಂಪನದ ತೀವ್ರತೆಗೆ ನೂರಾರು ಕಟ್ಟಡಗಳು ಕುಸಿದು ಹಲವು ಕಟ್ಡಡಗಳು ಬಿರುಕುಗೊಂಡಿದ್ದವು. ಸತತ ಒಂದು ವಾರ ನಡೆದ ಕಾರ್ಯಾಚರಣೆಯಲ್ಲಿ ಅಂತಿಮವಾಗಿ 36 ಮಂದಿ ಸಾವನ್ನಪ್ಪಿ, 525 ಮಂದಿ ಗಾಯಗೊಂಡಿದ್ದರು. ಅಂತೆಯೇ ಅಂದು ಭೂಕಂಪನದಲ್ಲಿ ಸಿಲುಕಿದ್ದ ಸುಮಾರು 113 ಮಂದಿ ಕುರಿತು ಇಂದಿಗೂ ಮಾಹಿತಿಯೇ ಲಭ್ಯವಾಗಿಲ್ಲ.

5) ಫಿಜಿಯನ್ನು ಕಾಡಿದ್ದ ಚಂಡಮಾರುತ
ಫೆಬ್ರವರಿ 21ರಂದು ಫಿಜಿಯಲ್ಲಿ ಸಂಭವಿಸಿದ್ದ ಟ್ರಾಪಿಕಲ್ ಚಂಡಮಾರುತ ಮಾರುತದಿಂದಾಗಿ ಸುಮಾರು 3 ಲಕ್ಷಕ್ಕೂ ಅಧಿಕ ಮಂದಿ ಅಕ್ಷರಶಃ ನೆಲೆಕಳೆದುಕೊಂಡಿದ್ದರು. ಘಟನೆಯಲ್ಲಿ ಸುಮಾರು 42 ಮಂದಿ ಸಾವಿಗೀಡಾಗಿ, 300ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದರು. ಚಂಡಮಾರುತದ ಪರಿಣಾಮ ಸುಮಾರು 3000ಕ್ಕೂ ಅಧಿಕ ಕುಟುಂಬಗಳು ನಿರಾಶ್ರಿತವಾಗಿದ್ದವು. ಅಂದು ಚಂಡಮಾರುತದ ಹೊಡೆತಕ್ಕೆ ಬಲಿಯಾದ ಸುಮಾರು 52 ಸಾವಿರ ಮಂದಿ ಇಂದಿಗೂ ಫಿಜಿಯಲ್ಲಿ ನಿರಾಶ್ರಿತ ತಾಣಗಳಲ್ಲೇ ವಾಸಿಸುತ್ತಿದ್ದಾರೆ.

6) ಸರ್ಬಿಯಾದಲ್ಲಿ ಭೀಕರ ಪ್ರವಾಹ
ಮಾರ್ಚ್ 7ರಂದು ಸರ್ಬಿಯಾದಲ್ಲಿ ಸಂಭವಿಸಿದ್ದ ಭಾರಿ ಮಳೆ ಭೀಕರ ಪ್ರವಾಹವನ್ನು ತಂದೊಡ್ಡಿತ್ತು. ಪ್ರವಾಹದ ಅಬ್ಬರಕ್ಕೆ ಸರ್ಬಿಯಾದ ಬರೊಬ್ಬರಿ 14 ಜಿಲ್ಲೆಗಳಲ್ಲಿ ಅಕ್ಷರಶಃ ತುರ್ತು ಪರಿಸ್ಥಿತಿ ಘೋಷಣೆ ಮಾಡಲಾಗಿತ್ತು. ಪ್ರವಾಹದ ರಭಸಕ್ಕೆ ಸುಮಾರು 710 ಮನೆಗಳು ಕೊಚ್ಚಿಕೊಂಡು ಹೋಗಿದ್ದವು. ಸುಮಾರು 1, 110 ಕುಟುಂಬಗಳು ನೆಲೆಕಳೆದುಕೊಂಡು ನಿರಾಶ್ರಿತವಾಗಿದ್ದವು. ರೆಡ್ ಕ್ರಾಸ್ ಸಂಸ್ಥೆ ಈ ಎಲ್ಲ ಕುಟುಂಬಗಳಿಗೆ ಗಂಜಿ ಕೇಂದ್ರ ತೆರೆದು ಉಪಚರಿಸಿತ್ತು. ಇಂದಿಗೂ ಸರ್ಬಿಯಾದಲ್ಲಿ ರೆಡ್ ಕ್ರಾಸ್ ಸಂಸ್ಥೆ ಗಂಜಿ ಕೇಂದ್ರವನ್ನು ಮುಂದುವರೆಸಿದೆ.

7) ಪಾಕಿಸ್ತಾನದಲ್ಲಿ ಭಾರಿ ಮಳೆ-ಪ್ರವಾಹ
ಇದೇ ಮಾರ್ಚ್ 7 ರಂದು ಪಾಕಿಸ್ತಾನದಲ್ಲೂ ಭೀಕರ ಪ್ರವಾಹ ಉಂಟಾಗಿತ್ತು. ಖೈಬರ್ ಪಖ್ತುಂಕ್ವ ಪ್ರದೇಶದಲ್ಲಿ ಬಿದ್ದ ಭಾರಿ ಮಳೆ ಪ್ರವಾಹಕ್ಕೆ ಕಾರಣವಾಗಿತ್ತು. ಅಂದಿನ ಪ್ರವಾಹದಲ್ಲಿ ಪಾಕಿಸ್ತಾನದ ಪಂಜಾಬ್, ಬಲೂಚಿಸ್ತಾನದಲ್ಲಿ ಸುಮಾರು 62 ಮಂದಿ ಸಾವನ್ನಪ್ಪಿ, 97 ಮಂದಿ ಗಂಭೀರವಾಗಿ ಗಾಯಗೊಂಡಿದ್ದರು. ಪ್ರವಾಹದ ಹೊಡೆತಕ್ಕೆ 171ಕ್ಕೂ ಅಧಿಕ ಮನೆಗಳು ಕೊಚ್ಚಿಕೊಂಡು ಹೋಗಿದ್ದವು. ಬಳಿಕ ಜೂನ್ 1ರಂದು ಮತ್ತೆ ಪಾಕಿಸ್ತಾನದ್ದಲ್ಲಿ ಭಾರಿ ಮಳೆಯಾಗಿ ರಾವಲ್ಪಿಂಡಿ, ಇಸ್ಲಾಮಾಬಾದ್, ಪೇಶಾವರ ಮತ್ತು ಲಾಹೋರ್ ನಲ್ಲಿ ಪ್ರವಾಹ ಉಂಟಾಗಿತ್ತು. ಅಂದ ಮತ್ತೆ 15ಕ್ಕೂ ಹೆಚ್ಚು ಮಂದಿ ತಮ್ಮ ಜೀವ ಕಳೆದುಕೊಂಡಿದ್ದರು. ಅಂತೆಯೇ 173 ಮಂದಿ ಗಾಯಗೊಂಡಿದ್ದರು.

8) ಈಕ್ವೇಡಾರ್ ಭೂಕಂಪನ
ಏಪ್ರಿಲ್ 17 ರಂದು ಈಕ್ವೆಡಾರ್ ನಲ್ಲಿ ಸಂಭವಿಸಿದ್ದ ಪ್ರಬಲ ಭೂಕಂಪನದಲ್ಲಿ ಸುಮಾರು 443 ಮಂದಿ ಸಾವನ್ನಪ್ಪಿದ್ದರು. ಅಂತೆಯೇ ಭೂಕಂಪನದಿಂದಾಗಿ ಹಲವು ಕಟ್ಟಡಗಳು ನೆಲಸಮಗೊಂಡಿದ್ದವು. ಘಟನೆಯಲ್ಲಿ 4027 ಮಂದಿ ಸಾವನ್ನಪ್ಪಿದ್ದರು. ಸರ್ಕಾರಿ ಇಲಾಖೆಗಳು ತಿಳಿಸಿರುವಂತೆ 805 ಬೃಹತ್ ಕಟ್ಟಡಗಳು ನೆಲಕ್ಕುರುಳಿ, 608 ಕಟ್ಟಡಗಳು ಜಖಂಗೊಂಡಿದ್ದವು.

9) ಶ್ರೀಲಂಕಾದಲ್ಲಿ ರೋನು ಚಂಡ ಮಾರುತ ಮತ್ತು ಪ್ರವಾಹ
ಮೇ 15 ರಂದು ಶ್ರೀಲಂಕಾದಲ್ಲಿ ಸಂಭವಿಸಿದ್ದ ರೋನು ಚಂಡಮಾರುತದಿಂದಾಗಿ ಭಾರಿ ಮಳೆ ಹಾಗೂ ಪ್ರವಾಹ ಉಂಟಾಗಿತ್ತು. ಪ್ರವಾಹದಿಂದಾಗಿ ಅದರ 25 ಜಿಲ್ಲೆಗಳ ಪೈಕಿ 22 ಜಿಲ್ಲೆಗಳಲ್ಲಿ ಪ್ರವಾಹ ಪರಿಸ್ಥಿತಿ ತಲೆದೋರಿತ್ತು. ಪ್ರವಾಹದಲ್ಲಿ 104 ಮಂದಿ ಸಾವನ್ನಪ್ಪಿ, 93 ಮಂದಿ ಇಂದಿಗೂ ನಾಪತ್ತೆಯಾಗಿದ್ದಾರೆ. ಪ್ರವಾಹದ ಹೊಡೆತಕ್ಕೆ ಸಿಲುಕಿ 3 ಲಕ್ಷಕ್ಕೂ ಅಧಿಕ ಮಂದಿ ನಿರಾಶ್ರಿತರಾಗಿದ್ದರು. ಈ ಪೈಕಿ 21 ಸಾವಿರ ಮಂದಿ ತಮ್ಮ ಸ್ವಗ್ರಾಮದಿಂದ ಶಾಶ್ವತವಾಗಿ ಸ್ಥಳಾಂತರಗೊಂಡಿದ್ದು, ನಾಲ್ಕು ಸಾವಿರಕ್ಕೂ ಅಧಿಕ ಮನೆಗಳು ಕೊಚ್ಚಿ ಹೋಗಿದ್ದವು.

10) ಬಾಂಗ್ಲಾದೇಶದಲ್ಲಿ ಪ್ರವಾಹ
ಜುಲೈ 29 ರಂದು ಬಾಂಗ್ಲಾದೇಶದಲ್ಲಿ ಉಂಟಾಗಿದ್ದ ಪ್ರಹಾವದಿಂದಾಗಿ 42 ಮಂದಿ ಅಸುನೀಗಿದ್ದರು. ಬಾಂಗ್ಲಾದ 7 ಜಿಲ್ಲೆಗಳಲ್ಲಿ ಸಂಭವಿಸಿದ್ದ ಭೀಕರ ಪ್ರವಾಹದಿಂದಾಗಿ ಸುಮಾರು 8 ಲಕ್ಷ ಮಂದಿ ನಿರಾಶ್ರಿತರಾಗಿದ್ದರು. ಬಾಂಗ್ಲಾದ ಪ್ರಮುಖ ನದಿಗಳು ಅಪಾಯಮಟ್ಟ ಮೀರಿ ಹರಿದಿದ್ದವು. ಸುಮಾರ 7 , 400 ಮಂದಿ ನಿರಾಶ್ರಿತ ಕೇಂದ್ರಗಳಲ್ಲಿ ಆಶ್ರಯ ಪಡೆದಿದ್ದರು. ಆಗಸ್ಚ್ 11ರಂದು ಇದೇ ಬಾಂಗ್ಲಾದ 19 ಜಿಲ್ಲೆಗಳಲ್ಲಿ ಮತ್ತೆ ಪ್ರವಾಹ ಸಂಭವಿಸಿತ್ತು. ಆಗ ಮತ್ತೆ 106 ಮಂದಿ ಸಾವನ್ನಪ್ಪಿ, ಲಕ್ಷಾಂತರ ಮಂದಿ ನಿರಾಶ್ರಿತರಾಗಿದ್ದರು.16 ಸಾವಿರಕ್ಕೂ ಹೆಚ್ಚು ಮನೆಗಳು ನೀರಿನಲ್ಲಿ ಕೊಚ್ಚಿಕೊಂಡು ಹೋಗಿದ್ದವು.

11) ನೇಪಾಳದಲ್ಲೂ ಪ್ರವಾಹ
ಜುಲೈ ತಿಂಗಳಲ್ಲಿ ನೇಪಾಳದ ಭೊಟೆಕೋಸಿ ನದಿಯಲ್ಲಿ ಉಂಟಾದ ಪ್ರವಾಹದಿಂದಾಗಿ ಮೂರು ಮಂದಿ ಸಾವನ್ನಪ್ಪಿದ್ದರು. ಅಂತೆಯೇ ನದಿ ಪಾತ್ರದಲ್ಲಿದ್ದ 38 ಮನೆಗಳು ಕೊಚ್ಚಿಕೊಂಡು ಹೋಗಿದ್ದವು.

12) ನ್ಯೂಜಿಲೆಂಡ್ ನಲ್ಲಿ ಭೀತಿ ಮೂಡಿಸಿದ್ದ ಸುನಾಮಿ
ಚಿಲಿಯಲ್ಲಿ ಸಂಭವಿಸಿದ್ದ ಪ್ರಬಲ ಭೂಕಂಪನದಿಂದಾಗಿ ನ್ಯೂಜಿಲೆಂಡ್ ನಲ್ಲಿ ಸುನಾಮಿ ಭೀತಿ ಆವರಿಸಿತ್ತು. ಸೆಪ್ಟೆಂಬರ್ 17 ರಂದು ನ್ಯೂಜಿಲೆಂಡ್ ಕರಾವಳಿ ತೀರಕ್ಕೆ ಅಲ್ಪ ಪ್ರಮಾಣದ ಸುನಾಮಿ ಅಲೆಗಳು ಅಪ್ಪಳಿಸಿದ್ದವು.

13) ಇಂಡೋನೇಷ್ಯಾ ಭೂಕಂಪ
ದ್ವೀಪಗಳ ಸಮೂಹ ರಾಷ್ಟ್ರ. ಇಂಡೋನೇಷ್ಯಾದಲ್ಲಿ 2016 ರಲ್ಲಿ ಸರಣಿ ಭೂಕಂಪಗಳು ಸಂಭವಿಸಿದ್ದವು. ಇಂಡೋನೇಷ್ಯಾದಲ್ಲಿ ಭೂಕಂಪನ ಪ್ರದೇಶಗಳಿದ್ದು, ಇವುಗಳನ್ನು ದಿ ಫೆಸಿಫಿಕ್ ರಿಂಗ್ ಆಫ್ ಫೈರ್ ಎಂದು ಕರೆಯುತ್ತಾರೆ. ಹೀಗಾಗಿ ಈ ಪ್ರದೇಶದಲ್ಲಿ ಭೂಕಂಪನ ಸರ್ವೇ ಸಾಮಾನ್ಯ.

*ಕೃಪೆ:- ಕನ್ನಡಪ್ರಭ*