ಇತಿಹಾಸದ ಪುಟ ಸೇರಿದ "ಸ್ಟೇಟ್ ಬ್ಯಾಂಕ್ ಆಪ್ ಮೈಸೂರು"

ಇತಿಹಾಸದ ಪುಟ ಸೇರಿದ ನಮ್ಮ "ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರು"!
ಬೆಂಗಳೂರು: ನೂರಕ್ಕೂ ಅಧಿಕ ವರ್ಷಗಳ ಇತಿಹಾಸವಿರುವ ಕರ್ನಾಟಕ ರಾಜ್ಯದ ಕನ್ನಡಿಗರ ಹೆಮ್ಮೆಯ ಮತ್ತು ಕನ್ನಡಿಗರನ್ನು ಗುರುತಿಸುವ ಮೈಸೂರು ಬ್ಯಾಂಕ್‌ ಎಂದೇ ಮನೆ ಮಾತಾಗಿದ್ದ ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರು  ಇತಿಹಾಸದ ಪುಟ ಸೇರಿದ್ದು, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದೊಂದಿಗೆ ಅಧಿಕೃತವಾಗಿ ವಿಲೀನವಾಗಿದೆ.

ಸುಮಾರು 3 ದಶಕಗಳ ಹಗ್ಗಜಗ್ಗಾಟದ ನಂತರ ಸಾರ್ವಜನಿಕ ಸ್ವಾಮ್ಯದ ದೊಡ್ಡ ಬ್ಯಾಂಕ್‌ ಆಗಿರುವ ಭಾರತೀಯ ಸ್ಟೇಟ್‌ ಬ್ಯಾಂಕ್‌ ನಲ್ಲಿ (ಎಸ್‌ಬಿಐ), ಅದರ ಐದು ಸಹವರ್ತಿ ಬ್ಯಾಂಕ್‌ ಗಳು ಶನಿವಾರ ವಿಲೀನಗೊಳ್ಳಲಿವೆ.  ಇದರಿಂದಾಗಿ ಬ್ಯಾಂಕ್‌ ಗಳ ಕೇಂದ್ರೀಕರಣ ನೀತಿಯಿಂದಾಗಿ ಐದು ಐತಿಹಾಸಿಕ ಬ್ಯಾಂಕ್‌ ಗಳು ಎಸ್ ಬಿಐನಲ್ಲಿ ವಿಲೀನಗೊಳ್ಳುವಂತೆ ಮಾಡಿದೆ. ಸ್ಟೇಟ್‌ ಬ್ಯಾಂಕ್‌ ಆಫ್‌ ಮೈಸೂರು, ಸ್ಟೇಟ್‌ ಬ್ಯಾಂಕ್‌ ಆಫ್‌ ತಿರುವಾಂಕೂರು, ಸ್ಟೇಟ್‌  ಬ್ಯಾಂಕ್‌ ಆಫ್‌ ಹೈದರಾಬಾದ್‌, ಸ್ಟೇಟ್‌ ಬ್ಯಾಂಕ್‌ ಆಫ್‌ ಪಾಟಿಯಾಲಾ ಮತ್ತು ಸ್ಟೇಟ್‌ ಬ್ಯಾಂಕ್‌ ಆಫ್‌ ಬಿಕಾನೇರ್‌ ಹಾಗೂ ಜೈಪುರಗಳು ಈ ದಿನ ಎಸ್‌ಬಿಐನಲ್ಲಿ ಲೀನವಾಗಲಿವೆ.

ಈ ಸಹವರ್ತಿ ಬ್ಯಾಂಕ್‌ಗಳಿಗೆ ಶುಕ್ರವಾರ ಕೊನೆಯ ಕೆಲಸದ ದಿವಸವಾಗಿತ್ತು ಈಗ ಎಸ್‌ ಬಿಐನಲ್ಲಿ 2,07,000 ಉದ್ಯೋಗಿಗಳಿದ್ದು, ಈಗ ಸಹವರ್ತಿ ಬ್ಯಾಂಕ್‌ ಗಳ ವಿಲೀನದಿಂದ ಆ ಬ್ಯಾಂಕ್‌ಗಳ 70 ಸಾವಿರ ಉದ್ಯೋಗಿಗಳು  ಸೇರ್ಪಡೆಯಾಗಲಿದ್ದಾರೆ. ಇದರಿಂದಾಗಿ ಒಟ್ಟು ಉದ್ಯೋಗಿಗಳ ಸಂಖ್ಯೆ 2,77,000 ಆಗಲಿದೆ. ಖಾಸಗಿ ಬ್ಯಾಂಕ್‌ ಗಳಿಗೆ ಪೈಪೋಟಿ ಒಡ್ಡುವ ಕಾರಣಕ್ಕೆ ಸರ್ಕಾರವು ಎಲ್ಲ ಸಹವರ್ತಿ ಬ್ಯಾಂಕ್‌ಗಳನ್ನು ಎಸ್‌ ಬಿಐನಲ್ಲಿ, ತೀವ್ರ ವಿರೋಧದ  ನಡುವೆಯೂ ವಿಲೀನಗೊಳಿಸಿದೆ. ಎಸ್‌ ಬಿಎಂ 1913ರಲ್ಲಿ, ಎಸ್‌ಬಿಟಿ 1945, ಎಸ್‌ಬಿಬಿಜೆ 1944, ಎಸ್‌ಬಿಪಿ 1917, ಎಸ್‌ಬಿಎಚ್‌ 1941ರಲ್ಲಿ ಸ್ಥಾಪನೆಯಾಗಿದ್ದವು.

ಕರ್ನಾಟಕದ ಹೆಮ್ಮೆ ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರು

1913ರ  ಅಕ್ಟೋಬರ್ 2ರಂದು,  ಬೆಂಗಳೂರಿನ ಅವೆನ್ಯೂ ರಸ್ತೆಯ ಸಣ್ಣ ಕಟ್ಟಡವೊಂದರಲ್ಲಿ ಅಸ್ತಿತ್ವಕ್ಕೆ ಬಂದಿದ್ದ ಬ್ಯಾಂಕ್‌ ಕಾಲಾನುಕ್ರಮದಲ್ಲಿ  ಬೃಹತ್ ಮರವಾಗಿ ಬೆಳೆದಿತ್ತು. ಸರ್‌. ಎಂ. ವಿಶ್ವೇಶ್ವರಯ್ಯ ಅವರ ಅಧ್ಯಕ್ಷತೆಯಲ್ಲಿ  ರಚಿತವಾದ ಬ್ಯಾಂಕಿಂಗ್‌ ಸಮಿತಿಯ ಶಿಫಾರಸಿನ ಮೇರೆಗೆ ಬೆಂಗಳೂರಿನ ಕೇಂದ್ರ ಸ್ಥಾನದಲ್ಲಿ 1913ರ ಅಕ್ಟೋಬರ್‌ 2ರಂದು ದಿ ಬ್ಯಾಂಕ್‌ ಆಫ್‌ ಮೈಸೂರು ಲಿ., ಸ್ಥಾಪಿಸಲಾಯಿತು. ಪ್ರಪ್ರಥಮ 20 ಲಕ್ಷ ರು. ಬಂಡವಾಳ ನಿಧಿಯನ್ನು  ಮಹಾರಾಜ ಶ್ರೀ ನಾಲ್ವಡಿ ಕೃಷ್ಣರಾಜ ಒಡೆಯರ್‌ ಅವರು ಹೂಡಿದರು. ಬಳಿಕ ದಿ ಬ್ಯಾಂಕ್‌ ಆಫ್‌ ಮೈಸೂರು ಲಿ., ಸ್ಟೇಟ್‌ ಬ್ಯಾಂಕ್‌ ಆಫ್‌ ಮೈಸೂರು (ಎಸ್‌ ಬಿಎಂ) ಎಂದು ನಾಮಕರಣಗೊಂಡು103 ವರ್ಷಗಳನ್ನು ಪೂರೈಸಿತು.

ಸರ್‌.ಎಂ.ವಿ  ಮತ್ತು ಮೈಸೂರು ಅರಸರ ಮಾರ್ಗ ದರ್ಶನದಲ್ಲಿ ಸ್ಥಾಪಿಸಿದ ಮೈಸೂರು ಬ್ಯಾಂಕ್‌ಗೆ 103 ವರ್ಷಗಳ ಇತಿಹಾಸವಿದೆ. 1960ರಲ್ಲಿ ಎಸ್‌ಬಿಎಂ ಅನ್ನು ಸಹವರ್ತಿ ಬ್ಯಾಂಕಾಗಿ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ  ತೆಗೆದುಕೊಂಡಿತು.  ಆಗ ಎಸ್‌ಬಿಎಂನ ಶೇ.75 ರಷ್ಟು ಷೇರುಗಳನ್ನು ಎಸ್‌ಬಿಐ ಹಿಡಿದುಕೊಂಡಿತ್ತು. ಉಳಿದ ಶೇ.25 ರಷ್ಟು ಮಾತ್ರ ಸಾರ್ವಜನಿಕರಲ್ಲಿತ್ತು. ಹಾಗಾಗಿ ಒಟ್ಟಾರೆ ಎಲ್ಲ ಸಹವರ್ತಿ ಬ್ಯಾಂಕಿನ ನಿಯಂತ್ರಣ ಎಸ್ ಬಿಐ  ಕೈಲಿತ್ತು. ಅಂದಿನಿಂದಲೇ ಎಲ್ಲ ಸಹವರ್ತಿ ಬ್ಯಾಂಕುಗಳು ಎಸ್‌ ಬಿಐನಲ್ಲಿ ವಿಲೀನವಾಗುತ್ತವೆ ಎಂದು ಹೇಳಿಕೊಂಡು ಬರುತ್ತಲೇ ಇದ್ದವು.

ಕೇಂದ್ರ ಸರ್ಕಾರ ತೆಗೆದುಕೊಂಡ ಕಠಿಣ ನಿರ್ಧಾರದಿಂದ ಎಲ್ಲ ಎಸ್‌ ಬಿಐ ಸಹವರ್ತಿ ಬ್ಯಾಂಕ್‌ ಗಳು ಮತ್ತು ಮಹಿಳಾ ಬ್ಯಾಂಕ್‌ ಗಳು ಏಪ್ರಿಲ್‌ 1, 2017ರಿಂದ ಎಸ್‌ಬಿಐನಲ್ಲಿ ವಿಲೀನವಾಗಲಿವೆ ಎಂದು ನಿರ್ಧರಿಸಲಾಯಿತು. ಆ  ದಿಸೆಯಲ್ಲಿ ಫೆಬ್ರವರಿಯಲ್ಲಿ ಆದೇಶ ಬಂತು. ಅದೇ ರೀತಿ ಸಂಸತ್ತಿ ಸದನಗಳಲ್ಲಿ ಕೂಡ ಇದಕ್ಕೆ ಅನುಮೋದನೆ ಪಡೆಯಲಾಗಿತ್ತು.